खड्डेमुक्तीसाठी निवारण कक्ष
पनवेल पालिकेकडून अधिकाऱ्यांची नियुक्ती
पनवेल, ता. ५ (बातमीदार)ः मेपासून सुरू असलेल्या पावसाने रस्त्यांची दुरवस्था झाली आहे. याच अनुषंगाने उच्च न्यायालयाने पालिका प्रशासनाला समिती गठित करण्याचे आदेश दिले आहे. त्यानुसार पनवेल महापालिकेने खड्डे निवारणासाठी स्वतंत्र कक्ष स्थापना केला आहे.
रस्त्यांच्या डांबरीकरणासाठी कोट्यवधी रुपये प्रशासनाने खर्च केले. पहिल्या पावसातच डांबरी केलेले अनेक रोड खड्ड्यात गेले आहेत. नवीन पनवेलमधील रस्त्यांची स्थिती फारशी वेगळी नाही. या ठिकाणी डांबरीकरण करण्यात आले होते, मात्र पावसाने जैसे थे परिस्थिती आहे. अशीच परिस्थिती पनवेल-सायन महामार्ग ते मानसरोवर रेल्वेस्थानक, तळोजा, नावडे अशा भागांचीसुद्धा झाली आहे. त्यामुळे वाढत्या तक्रारी लक्षात घेता आयुक्त मंगेश चितळे यांच्या अध्यक्षतेखाली पनवेल महापालिकेने प्रभागनिहाय नोडल अधिकाऱ्यांमार्फत खड्ड्यांबाबतच्या तक्रारींचे निवारण केले जाणार आहे.
----------------------------
करा बिनधास्त तक्रारी
महापालिका हद्दीत कोणत्याही भागात रस्त्यावर खड्डे पडले असतील तर पनवेल महापालिकेच्या नोडल अधिकाऱ्यांना संपर्क करता येणार आहे. तसेच नागरिकांनी आपल्या भागाची माहिती, प्लॉट नंबर, फोटो काढून व्हॉट्सॲप करावा, असे आवाहन पालिकेच्या वतीने करण्यात आले आहे.
------------------------------
पनवेल महापालिकेने नागरिकांच्या तक्रारींवर तत्काळ आणि परिणामकारक कारवाई व्हावी, यासाठी ‘खड्डे निवारण कक्ष’ सुरू केला आहे. प्रत्येक प्रभागासाठी नोडल अधिकारी नियुक्त करण्यात आले आहेत.
- गणेश शेटे, अतिरिक्त आयुक्त, पनवेल