इलेक्ट्रिक दुचाकी सर्व्हिस सेंटर बंद

तारापूर, ता. ५ (बातमीदार) ः पालघर येथील ओला इलेक्ट्रिक दुचाकीमालकांना काही दिवसांपासून मोठ्या अडचणींचा सामना करावा लागत आहे. पालघर येथील कंचन बिझनेस पार्क येथे असलेले ओला इलेक्ट्रिकचे सर्व्हिस सेंटर आठ दिवसांपासून बंद आहे. त्यामुळे वाहनांच्या देखभाल आणि तांत्रिक अडचणींवर कोणतीही मदत मिळत नसल्याची तक्रार ग्राहकांकडून करण्यात येत आहे.
सेंटर बंद असल्यामुळे परिसरात दुरुस्तीची प्रतीक्षा करणाऱ्या दुचाकींचा खच साचला आहे. काही वाहने तर गेल्या अनेक महिन्यांपासून उभी आहेत. तरीदेखील, या वाहनांचे नेमके काय होणार आणि सर्व्हिस सेंटर पुन्हा सुरू होणार का, याबाबत कंपनीकडून कोणतीही अधिकृत माहिती देण्यात आलेली नाही. ग्राहकांचे म्हणणे आहे की, “कंपनीकडून कोणताही प्रतिनिधी संपर्कात नाही. ॲप किंवा हेल्पलाइनवर तक्रार दाखल केली, तरी प्रतिसाद मिळत नाही. त्यामुळे आमचे हजारो रुपयांचे नुकसान होत आहे.”
----
मी ओला शोरूममधून ओला बाइक खरेदी केली होती. आता गाडीची सर्व्हिस करायची आहे, मात्र गेल्या अनेक दिवसांपासून हे शोरूम बंद असल्याने गाडी कुठे सर्व्हिसिंग करायची हा प्रश्न आहे. याबाबत कंपनीशी संपर्क साधला असता कंपनीचे काही उत्तर येत नाही.
शिवम मोरे, मोटारसायकल ग्राहक, बोईसर