पिस्टल बाळगणाऱ्या दोघांना अटक
सकाळ वृत्तसेवा
ठाणे, ता. ६ : अवैधरीत्या पिस्टल बागळून त्याच्या विक्रीसाठी आलेल्या अहिल्यानगर येथील दोघांना अटक करण्यात आली.
ओम ऊर्फ लाला राजेंद्र कुदांडे (२०) आणि पुण्यातील प्रताप ऊर्फ आप्पा बाळासो लोंढे (२४) अशी अटक केलेल्यांची नावे आहेत. ठाणे ग्रामीण पोलिसांनी ही कारवाई केली. त्यांच्याकडून पिस्टलसह तीन जिवंत काडतुसे असा ५३ हजार रुपयांचा ऐवज जप्त करण्यात आला.
अवैध धंदे, अवैध अग्निशस्त्रे, पाहिजे फरारी आरोपींच्या शोधासाठी जिल्ह्यात ग्रामीण पोलिसांच्या स्थानिक गुन्हे शाखा पथकामार्फत पेट्रोलिंग सुरू होते. या वेळी गुप्त बातमीदाराकडून माहिती मिळाली. त्यानुसार मुंबई-नाशिक महामार्गावरील सोनाळे फाटा येथे त्या दोघांना अटक करण्यात आली. याप्रकरणी भिवंडी तालुका पोलिस ठाण्यात गुन्हा दाखल करण्यात आला असून, पोलिस उपनिरीक्षक रोहन शेलार तपास करीत आहेत.
-----------