पतीकडून पत्नीचा खून
टिटवाळा, ता. ७ (वार्ताहर ) ः वरप येथील विश्वजीत प्रिअर्स सोसायटीत गुरुवारी रात्री उशिरा घडलेल्या घटनेत, पतीने पत्नीवर धारदार चाकूने वार करून तिचा खून केला. त्यानंतर स्वतःवरही वार करून आत्महत्येचा प्रयत्न केला. चारित्र्याच्या संशयावरून हा प्रकार घडल्याचे समजते.
मिळालेल्या माहितीनुसार, संतोष बापू पोहळ (वय ४१) आणि विद्या पोहळ (वय ४०) हे दोघे आपल्या दोन मुलांसह विश्वजीत प्रिअर्स येथे राहत होते. गेल्या काही दिवसांपासून दोघांमध्ये चारित्र्याच्या संशयावरून वाद सुरू होता. गुरुवारी रात्री वाद एवढा वाढला की संतोषने संतापाच्या भरात पत्नीवर चाकूने वार केले. गंभीर जखमी झालेली विद्या व रक्तबंबाळ अवस्थेत पडलेला संतोष यांना शासकीय रुग्णालयात दाखल करण्यात आले, मात्र उपचार सुरू असतानाच विद्याचा मृत्यू झाला, तर संतोषचा जीव वाचवण्यासाठी डॉक्टर प्रयत्नशील आहेत. पोलिसांनी घटनास्थळाचा पंचनामा करून पुढील तपास सुरू केला आहे.
-----