रेतीबंदर खाडीत दोन दिवसांत दोन मृतदेह
कळवा, ता. ७ (बातमीदार) : ठाण्यातील मुंब्रा रेतीबंदर खाडी परिसरात गेल्या दोन दिवसांत दोन अज्ञात तरुण मृतदेह आढळल्याने मोठी खळबळ उडाली आहे. गुरुवारी (ता. ६) अज्ञात महिलेचा मृतदेह सापडल्यानंतर शुक्रवारी (ता. ७) सकाळी १० च्या सुमारास त्याच ठिकाणी २५ वर्षीय अज्ञात तरुणाचा मृतदेह आढळून आला. खाडीत मासे पकडणाऱ्या मच्छीमारांनी हा मृतदेह तरंगताना पाहिल्यानंतर तातडीने मुंब्रा पोलिसांना माहिती दिली. पोलिसांनी घटनास्थळी धाव घेऊन मच्छीमारांच्या मदतीने मृतदेह बाहेर काढून कळवा येथील छत्रपती शिवाजी महाराज रुग्णालयात शवविच्छेदनासाठी पाठवला आहे. गेल्या दोन दिवसांत एकाच वयोगटातील तरुण महिला आणि पुरुषाचा मृतदेह एकाच ठिकाणी आढळल्यामुळे परिसरात उलटसुलट चर्चा सुरू असून, मुंब्रा पोलिसांनी या प्रकरणाचा तपास सुरू केला आहे.