महिलांना कर्करोगाचा वाढता धोका
राज्यातील दीड कोटी महिलांची तपासणी
सकाळ वृत्तसेवा
मुंबई, ता. ७ ः गेल्या काही वर्षांत कर्करोगाचे प्रमाण वाढले असून महिलांमध्ये कर्करोगाचे वाढते प्रमाण चिंतेचा विषय बनला आहे. राज्यातील कर्करोग रुग्णांचा शोध घेत निदान व वेळीच उपचार करणे शक्य व्हावे, यासाठी राज्यात आरोग्य शिबिरांचे आयोजन करण्यात आले होते. यात एक कोटी ५१ लाख १० हजार महिलांची तपासणी करण्यात आली असता १७ हजार ६१८ महिलांना मुख कर्करोगाचे निदान झाले. तर, ४५० महिलांना स्तनाचा कर्करोग झाल्याचे समोर आले. विशेष म्हणजे, सर्वाधिक संशयित रुग्ण नागपूर जिल्ह्यात आढळून आले आहेत.
राज्य सरकारने ‘स्वस्थ नारी, सशक्त परिवार’ अभिमान राज्यात राबवले असून याद्वारे महिलांच्या आरोग्याची तपासणी करण्यासाठी सर्वत्र शिबिरांचे आयोजन करण्यात येत आहे. अनेक जिल्ह्यांतील महिला या कर्करोग आणि ॲनिमियाने ग्रासल्याचे समोर आले आहे. तसेच, मधुमेह आणि उच्च रक्तदाबानेही अनेक महिला ग्रस्त आहेत. या महिलांच्या आरोग्याची काळजी घेत राज्य सरकारच्या वतीने उपचार दिले जात असल्याची माहिती राज्याच्या आरोग्य विभागातील वरिष्ठ अधिकाऱ्याने दिली. राज्यभरात आतापर्यंत तीन लाख ३८ हजार २७९ ठिकाणी शिबिर घेण्यात आले. या शिबिरांमध्ये एक कोटी ५१ लाख दहा हजार महिलांच्या आरोग्याची तपासणी करण्यात आली. यामध्ये १७,६१८ महिला मुख कर्करोगाच्या संशयित आढळल्या. सर्वाधिक संशयित रुग्ण नागपूरमध्ये ३,७४४, बुलढाणा १,२६९ आणि अमरावती १,४६० इतके आढळले. या पाठोपाठ नाशिकमध्ये ५६५ महिला रुग्ण संशयित आढळले असून त्यापैकी ४६ महिलांच्या बायोप्सी नमुने घेण्यात आले तर ३४ महिलांना कर्करोग असल्याचे निष्पन्न झाले आहे. राज्यभरात एकूण बायोप्सी नमुने घेण्यात आलेल्या २,३४९ महिलांपैकी ८४१ महिलांना मुख कर्करोग असल्याचे निदान झाले आहे.
४५० महिलांना स्तन कर्करोग!
राज्यातील ८२ लाख ५१ हजार महिलांची तपासणी करण्यात आली. स्तन कर्करोगाच्या १२,२८६ संशयित रुग्णांपैकी १,४७० रुग्णांची बायोप्सी करण्यात आली. यापैकी ४५० महिलांना स्तन कर्करोग असल्याचे स्पष्ट झाले. नाशिक जिल्ह्यात सर्वाधिक ३० महिला, त्यापाठोपाठ सातारा २८ आणि सांगलीत २९ महिला स्तन कर्करोग पीडित आढळल्या.
२३४ महिला सर्विक्स कर्करोगाने त्रस्त!
सर्विक्स कर्करोग (गर्भाशयाच्या मुखाचा कर्करोग) तपासणीसाठी ५४ लाख ४७ हजार महिलांची तपासणी करण्यात आली. यापैकी, दहा हजार महिला संशयित रुग्ण आढळले आहेत. त्यापैकी १,७१० महिलांची बायोप्सी करण्यात आल्यानंतर २३४ महिलांना हा कर्करोग असल्याचे निदान करण्यात आले आहे. नागपूर, बुलढाणा, पुणे, सोलापूर आणि नाशिक जिल्ह्यात सर्विक्स कर्करोगाने ग्रस्त असलेल्या महिला अधिक आढळून आल्या.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.