अंबरनाथ (वार्ताहर) : अंबरनाथचे माजी नगरसेवक कुणाल भोईर यांनी आपल्या कार्यकाळातील विकासकामांचा आढावा घेणारा सर्वंकष कार्यअहवाल प्रकाशित केला. त्यांच्या वाढदिवसानिमित्त आयोजित कार्यक्रमात कार्यअहवालाचे प्रकाशन कल्याण लोकसभेचे खासदार डॉ. श्रीकांत एकनाथ शिंदे यांच्या हस्ते करण्यात आले. अहवालात रस्ते, सांडपाणी, प्रकाश व्यवस्था, पाणीपुरवठा, शिक्षण, आरोग्य आणि महिला-बालकल्याण अशा विविध क्षेत्रांतील विकासकामांचा समावेश आहे. तसेच सामाजिक आणि जनजागृती उपक्रमांचीही माहिती या अहवालात देण्यात आली आहे. कार्यक्रमादरम्यान खासदार डॉ. श्रीकांत शिंदे म्हणाले, कुणाल भोईर यांनी जनतेचा विश्वास जपत प्रामाणिकपणे काम केले आहे. त्यांच्या कार्यात जनसंपर्क, पारदर्शकता आणि सेवा वृत्ती दिसून येते. या वेळी भोईर म्हणाले, हा कार्यअहवाल केवळ आकडेवारी नसून, जनतेचा विश्वास आणि कार्यकर्त्यांच्या मेहनतीचे प्रतिबिंब आहे. ‘जनतेचा विकास हाच खरा ध्यास’ या भावनेने आम्ही पुढेही काम करत राहू.