अंबरनाथ, ता. ८ (वार्ताहर) : शहरात सुरू असलेल्या जुगार व्यवसायावर पोलिसांनी मोठी कारवाई करत विविध ठिकाणी एकाच वेळी छापे टाकले. बांगडी गल्ली, स्वामीनगर आणि रेल्वे स्थानक परिसरातील जुगार अड्ड्यांवर झालेल्या कारवाईत १५ जणांना अटक करण्यात आली.
गुप्त माहितीच्या आधारे पोलिस कर्मचारी गणेश गुत्ते यांच्या पथकाने गुरुवारी (ता. ६) संध्याकाळी साडेसहा वाजता बंद गाळ्यात सुरू असलेल्या तीन पत्तीच्या जुगारावर छापा टाकला. या वेळी आरोपींकडून पत्ते, रोख रक्कम आणि जुगाराचे साहित्य जप्त करण्यात आले. अटक आरोपींमध्ये चंद्रकांत गायकवाड, राजेंद्र द्रावीडर, विरजपुण विरास्वामी, ज्ञानेश्वर पळवळ, समीर खान, सुभाष भांगरथ, विजय चलवादी, नंदकुमार मुद्दलीयार, सायबू भंडारे, नईम खान, पंजु पाटकर, सुरज जैस्वाल, निशाज जयप्रकाश, अक्रम शेख आणि अखिल शेख यांचा समावेश आहे. याप्रकरणी सर्वांविरुद्ध गुन्हा नोंदवला आहे. पुढील तपास पोलिस उपनिरीक्षक शाहू काळदाते करीत आहेत. शहरात वाढत्या जुगार प्रकरणांवर पोलिसांनी आणखी कठोर कारवाईचा इशारा दिला आहे.