उल्हासनगर, ता. ८ (वार्ताहर) : उल्हासनगर कॅम्प २ मधील आझादनगरात दोन नशेबाज तरुणांनी दुकानदाराला बोलण्यात गुंतवून गल्ल्यातील रक्कम चोरण्यासाठी आखलेला डाव दुकानदाराच्या तीक्ष्ण नजरेमुळे हाणून पाडला गेला. अर्धा तास चाललेल्या या खेळीचा संपूर्ण पुरावा सीसीटीव्हीत कैद झाला आहे. पोलिसांनी दोन्ही तरुणांचा शोध सुरू केला आहे.
कॅम्प क्रमांक २ मधील आझादनगर परिसरात घडलेल्या चोरीच्या प्रयत्नाने व्यापाऱ्यांचे डोळे उघडे झाले आहेत. ‘अन्सारी मनी ट्रान्स्फर’ या दुकानात दोन नशेखोर तरुण आले होते. एक तरुण दुकानदाराशी हलक्या-फुलक्या प्रश्नांवर चर्चा करून गप्पांच्या ओघात अडकवू लागला. तर दुसरा तरुण वेळोवेळी दुकानातील गल्ल्यातील पैशांच्या ठिकाणावर नजर ठेवत, योग्य संधीची वाट पाहत होता. त्यांचे नशेतले डोळे, संशयास्पद हालचाली आणि सतत आजूबाजूला पाहण्याची कृती दुकानदाराच्या नजरेतून सुटली नाही. सुमारे ३० मिनिटे दोघेही दुकानदाराला बोलण्यात गुंतवून चोरीचा प्रयत्न करत राहिले. अखेर एक तरुण गल्ल्यातील पैसे उचलण्यासाठी पुढे सरसावला; पण त्याच क्षणी दुकानदाराने रोखण्याचा प्रयत्न केला. संपूर्ण घटनेचा व्हिडिओ सीसीटीव्हीत कैद झाला आहे. घटनेनंतर दुकानदाराने पोलिसांत तक्रार नोंदवली असून, पोलिसांनी दोन्ही नशेबाज तरुणांच्या शोधासाठी मोहीम हाती घेतली आहे.