राष्ट्रवादी काँग्रेसमध्ये पक्षप्रवेशाला वेग!
कर्जत, ता. ८ (बातमीदार) : कर्जत-खालापूर मतदार संघात राष्ट्रवादी काँग्रेस पक्षाचा प्रभाव दिवसेंदिवस वाढताना दिसत आहे. शनिवारी (ता.८) सुतारवाडी (ता. रोहा) येथे आयोजित केलेल्या पक्षप्रवेश सोहळ्यात मोठ्या संख्येने कार्यकर्त्यांनी राष्ट्रवादी काँग्रेस पार्टीमध्ये प्रवेश केला. राष्ट्रवादीचे प्रदेशाध्यक्ष व खासदार सुनील तटकरे यांच्या हस्ते तसेच जिल्हाध्यक्ष सुधाकर घारे यांच्या प्रमुख उपस्थितीत प्रवेश प्रक्रिया पार पडली. कर्जत खालापूर मतदार संघातील कर्जत शहर, कर्जत ग्रामीण आणि खोपोली शहर विभागातील कार्यकर्त्यांनी पक्षात प्रवेश केला.

येत्या स्थानिक स्वराज्य संस्थेच्या निवडणुकांत राष्ट्रवादी काँग्रेस पार्टीची ताकद मोठ्या प्रमाणात वाढणार असल्याचा विश्वास जिल्हाध्यक्ष सुधाकर घारे यांनी यावेळी व्यक्त केला. कर्जत ग्रामीणमधील कशेले येथील राम राणे यांच्या नेतृत्वाखाली हरिश्चंद्र राणे, ऋषिकेश राणे, अरुण काळोखे यांच्यासह अनेक कार्यकर्ते राष्ट्रवादीत दाखल झाले. या प्रवेशामुळे पाथरज जिल्हा परिषद विभागात राष्ट्रवादी काँग्रेसची ताकद आणखी वाढली आहे. शिवसेना शिंदे गटाचे मोग्रज ग्रामपंचायतचे माजी उपसरपंच विलास भला आणि माजी उपसरपंच प्रकाश थोराड यांचा देखील राष्ट्रवादी काँग्रेस पक्षामध्ये जाहीर प्रवेश झाला.