म्हाडा फ्लॅटच्या नावाने ३७ लाखांची फसवणूक
साकीनाका येथील घटना; तिघांविरुद्ध गुन्हा दाखल
अंधेरी, ता. १० (बातमीदार) ः म्हाडाच्या फ्लॅटच्या नावाने एका वयोवृद्ध व्यावसायिकाची सुमारे ३७ लाखांची फसवणूक केल्याप्रकरणी तिघांविरुद्ध साकिनाका पोलिसांनी गुन्हा दाखल केला आहे. करुणाकर पुजारी, सुनिता करुणाकर पुजारी आणि सनी जनार्दन कांबळे अशी या तिघांची नावे असून, लवकरच पोलिसांकडून चौकशी होणार आहे.
तक्रारदार ६२ वर्षांचे असून, ते त्यांच्या कुटुंबीयांसोबत साकीनाका परिसरात राहतात. याच परिसरात त्यांच्या मालकीचे एक इलेक्ट्रॉनिक दुकान आहे. पुजारी हे याच परिसरात राहात असल्याने त्यांच्यात कौटुंबिक संबंध होते. त्यातच करुणाकर हा रिअल इस्टेट म्हणून काम करत असल्याने त्यांनी त्यांना फ्लॅट खरेदीविषयी विचारणा केली होती. या वेळी त्यांच्यासह त्यांची पत्नी सुनिताने त्यांना म्हाडाचा फ्लॅट स्वस्तात देण्याचे आश्वासन दिले होते.
म्हाडा इमारतीमध्ये काहींना रूम अलोट झाले आहे, मात्र त्यांनी अलोटमेंट रक्कम न भरल्याने त्यांचे अलोटमेंट रद्द झाले आहेत. त्यामुळे या इमारतीमध्ये काही रूम खाली आहेत. त्यापैकी एक रूम देण्याची बतावणी केली होती. त्यांचा विश्वास बसावा म्हणून त्यांनी त्यांना एक फ्लॅट दाखविला होता. ८७ लाखांमध्ये हा फ्लॅट देण्याचे आश्वासन देऊन त्यांनी त्यांच्याकडून फ्लॅटसाठी टप्प्याटप्प्याने ३७ लाख रुपये दिले होते. या वेळी त्यांनी म्हाडा कार्यालयातील पावती आणि सादर केलेले डिमांड ड्राफ्टचे दस्तऐवज दिले होते. काही दिवसांनी त्यांनी सनी कांबळेशी ओळख करून तो म्हाडाचा वरिष्ठ अधिकारी असल्याचे सांगितले. तोच त्यांना म्हाडा इमारतीमध्ये फ्लॅट मिळवून देणार आहे, असे सांगून त्यांचा विश्वास संपादन केला होता. ठरलेल्या वेळेत त्यांना फ्लॅटचा ताबा मिळत नव्हता. त्यामुळे ते स्वतः म्हाडा कार्यालयात विचारणा करण्यासाठी गेले होते. या वेळी त्यांनी दिलेल्या म्हाडाच्या पावत्या आणि डिडी बोगस असल्याचे समजले. या घटनेनंतर त्यांनी त्यांच्याकडे पैशांची मागणी केली होती. त्यामुळे त्यांनी तीन धनादेश दिले, मात्र ते तिन्ही धनादेश बँकेत न वटता परत आले होते. त्यांनी तिन्ही आरोपीविरुद्ध साकीनाका पोलिसांत तक्रार केली होती.