‘अग्निसुरक्षा यंत्रणांची तपासणी करा’
पनवेल (बातमीदार)ः कामोठा येथील माजी नगरसेवक विकास घरत यांनी पनवेल महापालिकेचे आयुक्त तथा प्रशासक मंगेश चितळे यांची भेट घेऊन महापालिका हद्दीतील अग्निसुरक्षा प्रतिबंधक यंत्रणेची सखोल तपासणी करण्यात यावी, अशी मागणी केली आहे. पनवेल महापालिका परिसरात आगीच्या घटना वारंवार घडत आहेत. अनेक निवासी, व्यापारी तसेच शासकीय इमारतींमध्ये अग्निसुरक्षा यंत्रणा कार्यरत नसल्याचे निदर्शनास आले आहे. या यंत्रणांची नियमित देखभाल आणि तपासणी झाली नसल्याने सुरक्षेला धोका निर्माण होण्याची शक्यता वर्तवली जात आहे. त्यामुळे पालिका स्तरावर दोषपूर्ण किंवा अकार्यक्षम अग्निसुरक्षा यंत्रणा दुरुस्त करण्याची मागणी निवेदनात करण्यात आली आहे.