विरार (बातमीदार) : आगाशी, विरार अर्नाळा शिक्षण संस्थेच्या पाच शाळांमधून गेल्या आठ दशकांमध्ये हजारो विद्यार्थ्यांनी विद्यार्जन करून ते मोठ्या नावारूपाला आले आहेत, मात्र गेल्या काही वर्षांत नाळे येथील शाळेतील विद्यार्थ्यांची पटसंख्या दिवसेंदिवस कमी होत चालली आहे. विद्यार्थी अन्य शाळांमध्ये जात असल्यामुळे विद्यार्थी पटसंख्या वाढवण्यासाठी करावयाच्या उपाययोजनांवर नाळा शाळेमध्ये रविवारी (ता. ९) विशेष चर्चासत्राचे आयोजन करण्यात आले होते.

स्वातंत्र्यपूर्व काळात समाजसुधारकांनी शिक्षणाचे महत्त्व लक्षात घेऊन १९४२ मध्ये आगाशी, विरार अर्नाळा शिक्षण संस्थेची स्थापना केली. त्यानंतरच्या काळात आगाशी, विरार, अर्नाळा, नाळे व चांदिप येथे संस्थेच्या शाळा स्थापन करून शिक्षणाचे कार्य अविरतपणे सुरू केले. या संस्थेची पद्मश्री भाऊसाहेब वर्तक विद्यामंदिर नाळा शाळेची इमारत १९७० मध्ये उभारण्यात आली. दर्जेदार शिक्षण दिले जात असतानाही गेली काही वर्षे या शाळेत विद्यार्थी पटसंख्या कमी होऊ लागली आहे. या शाळेच्या सर्वांगीण विकासाच्या दृष्टीने माजी विद्यार्थी, ग्रामस्थ, पाल्य व शिक्षणप्रेमी यांची मते जाणून घेण्यासाठी एका विशेष सभेचे आयोजन करण्यात आले होते. शाळेतील सोयीसुविधांचा आढावा आणि असुविधा दूर करण्यासाठी उपाययोजनांवर चर्चा करण्यात आली. या वेळी संजीवनी परिवारातर्फे सुरू करण्यात आलेल्या अभ्यासिकेची माहिती उपस्थितांना देण्यात आली. सर्व सुविधांनी युक्त ही अभ्यासिका असून, २४ जणांना लाभ घेता येणार आहे.