फलाटावरील बेसिन दुरवस्थेत!
मालाड, ता. १२ (बातमीदार) : मालाड रेल्वेस्थानक फलाट क्रमांक १ आणि २ येथे प्रवाशांच्या सोयीसाठी लावलेली स्टीलची वाॅश बेसिन सध्या पूर्णपणे दुरवस्थेत आहे. काही महिन्यांपूर्वी रेल्वे प्रशासनाने ही सुविधा उपलब्ध करून दिली होती. काही प्रवासी बेसिनमध्ये पान-गुटखा थुंकत असल्याने परिसर अत्यंत अस्वच्छ झाला आहे. बेसिनखालील वाहिनी तुंबल्यामुळे तिथे सतत दुर्गंधी पसरत आहे. यामुळे प्रवाशांना त्रास होत आहे. सुविधांचा गैरवापर झाल्यास त्या भविष्यात बंद होतील, अशी भीती सुज्ञ प्रवाशांनी व्यक्त केली असून, रेल्वे प्रशासनाने या समस्येकडे तत्काळ लक्ष देऊन स्वच्छतेची व्यवस्था करण्याची मागणी केली आहे.