भिवंडीत लाखोंची वीजचोरी
तिघांविरोधात गुन्हा दाखल
भिवंडी, ता. १२ (वार्ताहर) : भिवंडी शहरात वीज वितरण आणि बिल वसुली करणाऱ्या टोरंट पॉवर कंपनीच्या भरारी पथकाकडून वीजचोरांविरोधात कठोर कारवाई सुरू आहे. अशाच एका कारवाईत टोरंट पॉवरने तब्बल साडेनऊ लाख रुपयांची वीजचोरी उघडकीस आणली असून, याप्रकरणी तीन जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, धामनकर नाका, पटेल कम्पाउंड परिसरातील अन्वर इमारतीमध्ये राहणारे सुफी इलीयास सोलंकी, कादीर सोलंकी आणि परवेझ सय्यद या तिघांनी संगनमत करून ही वीजचोरी केली. त्यांनी जवळच्या विद्युत पुरवठा वाहिनीतून चोरीची केबल जोडणी केली. या केबलद्वारे वीज मीटरशिवाय अनधिकृत वीजपुरवठा घेऊन वापर केला. २६ सप्टेंबर २०२४ पासून वर्षभराच्या कालावधीत त्यांनी एकूण ५७ हजार ५७३ युनिट्स वीज वापरली. या वीजचोरीचे एकूण मूल्य नऊ लाख ४९ हजार २७३ रुपये इतके असल्याचे उघड झाले आहे. टोरंट पॉवरच्या तक्रारीवरून या तिघांविरोधात शांतीनगर पोलिस ठाण्यात वीजचोरीचा गुन्हा दाखल करण्यात आला आहे.