कासा, ता. १३ (बातमीदार) : काही दिवसांपूर्वी डहाणू शहरात फटाके फोडण्यावरून उद्भवलेल्या वादानंतर राज्याचे मंत्री नितेश राणे यांनी डहाणूला भेट देऊन या घटनेतील पीडित हिंदू बांधवांची भेट घेतली. त्यांनी या प्रकरणातील प्रशासकीय अधिकाऱ्यांना तत्काळ आणि कडक कारवाई करण्याचे आदेश दिले.

मंत्रालयात काही हिंदुत्ववादी संघटनांनी त्यांची भेट घेऊन डहाणू परिसरातील तणावपूर्ण घटनांची माहिती दिली होती. त्यानुसार त्यांनी प्रत्यक्ष घटनास्थळाची पाहणी केली आणि पीडित कुटुंबीयांशी संवाद साधला, असे राणे यांनी सांगितले. या दौऱ्यात मंत्री राणे यांनी डहाणूतील हिंदू बांधवांच्या घरालगत उभारलेल्या एका अनधिकृत कामाची पाहणी करून संबंधित अधिकाऱ्यांना हे अतिक्रमण शासकीय प्रक्रियेद्वारे तातडीने काढण्याचे निर्देश दिले.

लक्ष्मीनारायण मंदिरात महाआरतीत सहभागी होत त्यांनी हिंदू समाजाशी संवाद साधला. डहाणूतील मच्छीमारांच्या प्रश्नांवर उपाययोजनेबाबत पत्रकार परिषदेत विचारले असता राणे म्हणाले, की राज्य व केंद्र सरकार याबाबत चौकशी करून लवकरच निर्णय घेईल. शेतकऱ्यांना जसा न्याय मिळतो तसाच मच्छीमारांनाही न्याय मिळणार आहे. तसेच पाकिस्तानात अटकेतील भारतीय मच्छीमारांच्या सुटकेसंदर्भात विचारले असता त्यांनी सांगितले, की या विषयावर सातत्याने प्रयत्न सुरू असून, लवकरच सकारात्मक निकाल मिळेल.