कोनगावमध्ये महिलेवर जीवघेणा हल्ला
दोन आरोपींविरुद्ध गुन्हा दाखल
वज्रेश्वरी ता १३(बातमीदार) : भिवंडी तालुक्यातील कोनगाव परिसरात एका महिलेवर तिच्या शेजाऱ्यांनी हल्ला केल्याचा धक्कादायक प्रकार घडला आहे. याप्रकरणी पोलिसांनी दोन तरुणांविरुद्ध गुन्हा दाखल केला आहे. पोलिसांनी दिलेल्या माहितीनुसार, ४० वर्षीय पीडित महिला कोनगाव सोसायटीत राहते. मंगळवारी (ता.११) संध्याकाळी चार वाजताच्या सुमारास ती तिच्या घरी असताना त्याच सोसायटीतील रहिवासी आकाश लोहार (वय२०) आणि त्याचा अज्ञात साथीदार तेथे आले. जुन्या वादावरून दोघांनी महिलेशी भांडण केले. यावेळी आरोपींनी लाकडी बटू आणि लोखंडी रॉडने महिलेवर हल्ला केला. ज्यामुळे तिच्या उजवा हात, पोट आणि डोक्याला गंभीर दुखापत झाली. स्थानिकांच्या मदतीने जखमी महिलेला तात्काळ जवळच्या रुग्णालयात दाखल करण्यात आले, जिथे तिच्यावर उपचार सुरू आहेत. आरोपी आकाश लोहार आणि त्याच्या साथीदाराविरुद्ध गुन्हा दाखल करण्यात आला आहे. सध्या दोन्ही आरोपी फरार आहेत. त्यांच्या शोधासाठी पोलिसांनी एक विशेष पथक तयार केले आहे. या प्रकरणाचा पुढील तपास पोलीस उपनिरीक्षक दिलीप धुमणे करत आहेत.