कासा स्मशानभूमीत अघोरी विधीचे अवशेष
नागरिकांमध्ये भीतीचे वातावरण

कासा, ता. १५ (बातमीदार) ः कासा गावातील सूर्या नदीकिनारी असलेल्या स्मशानभूमीत अघोरी विद्या वा जादूटोण्याचे प्रयोग झाल्याचे अवशेष आढळले आहेत. दोन दिवसांपूर्वी रात्री अज्ञात व्यक्तींनी हे विधी केल्याचा प्राथमिक अंदाज आहे.
सकाळी फिरायला गेलेल्या एका ग्रामस्थाला स्मशानभूमी परिसरात लाकडाची बाहुली, तांदळाच्या पिठाची बाहुली, लिंबू, टाचण्या, विविध आकृत्यांची रांगोळी यांसारखे साहित्य आढळले.
स्थानिकांच्या म्हणण्यानुसार, अशा अघोरी विधींचा उपयोग एखाद्यावर जादूटोणा करणे, त्रास देणे किंवा कथित ‘पैशाचा पाऊस’ पाडण्यासाठी केला जातो, अशी वनराईत पसरलेली समजूत आहे. यामुळे नागरिकांमध्ये भीतीचे वातावरण निर्माण झाले आहे.
यापूर्वीही वर्षभरापूर्वी जवळच्या गावातील स्मशानभूमीत अशाच प्रकारचे विधी केल्याचे प्रकरण समोर आले होते. रात्री अंत्यसंस्कारासाठी गेलेल्या नागरिकांना तेथे काही जण जादूटोण्याचे प्रयोग करताना दिसल्याची माहिती आहे. ज्येष्ठ नागरिक श्रावण गावित यांनी सांगितले की, “ग्रामीण भागात असे प्रकार अद्याप सुरू आहेत. कासाच्या सरपंच सुनीता कामडी यांनी सांगितले, “कासा स्मशानभूमीत असा प्रकार पहिल्यांदाच घडला आहे. याबाबत पोलिस ठाण्यात तक्रार करणार आहोत. परिसरात सुरक्षेच्या दृष्टीने सीसीटीव्ही बसवण्याचीही तयारी सुरू केली आहे. नागरिकांनी घाबरून जाऊ नये, परिस्थितीवर आम्ही लक्ष ठेवत आहोत.”