नेरूळ रेल्वेस्थानक परिसरात सिडकोची कारवाई
नेरूळ, ता. १६ (बातमीदार) : नवी मुंबईतील सिडको अनधिकृत बांधकाम विभागाने गुरुवारी (ता. १३) नेरूळ रेल्वेस्थानकाच्या पदपथावरील तसेच परिसरातील अनधिकृत स्टॉल आणि फेरीवाल्यांवर कारवाईचा बडगा उगारला. या कारवाईत रेल्वेस्थानकाच्या पदपथावरील तसेच परिसरातील अनधिकृत स्टॉल जमीनदोस्त केले. सिडकोच्या प्रचलित नियमावलीचा भंग करून उभारलेले हे अतिक्रमण हटवण्यासाठी मुख्य नियंत्रक, अनधिकृत बांधकामे, नवी मुंबई यांच्या मार्गदर्शनाखाली ही मोहीम राबवण्यात आली. या कारवाईत दोन ट्रक भरून स्टॉलचा माल जप्त करण्यात आला. स्थानिक पोलिस, सिडको पोलिस पथक, सिडको सुरक्षा रक्षक आणि महाराष्ट्र सुरक्षा मंडळाचे सुरक्षा रक्षक यांच्या संयुक्त सहभागाने ही कारवाई यशस्वी करण्यात आली. भविष्यातही अनधिकृत अतिक्रमणांविरोधात कठोर भूमिका घेण्याचे संकेत सिडको प्रशासनाने दिले आहेत, ज्यामुळे परिसरातील अनधिकृत व्यवसायांना चाप बसला आहे.