पालघर, ता. १६ : सफाळे पूर्वेकडील नागरिकांना रेल्वेस्थानकावर जाण्यासाठी लांबलचक पुलावरून कसरत करून जावे लागत होते. या पार्श्वभूमीवर पूर्वेकडे उद्‍वाहन बसवण्याची मागणी करण्यासाठी सफाळे विकास कृती समितीने चार दिवस आंदोलन केले होते. सफाळे पूर्व भागातील उद्‍वाहन तत्काळ सुरू करण्याच्या मागणीला रेल्वे प्रशासन, जिल्हाधिकारी कार्यालय आणि सफाळे विकास कृती समिती यांच्या संयुक्त बैठकीत हिरवा कंदील मिळाला होता. त्यानुसार उद्‍वाहनाचे लोकार्पण खासदार हेमंत सावरा यांच्या हस्ते करण्यात आले.

उपोषणादरम्यान रखडलेल्या महत्त्वाच्या मागण्यांपैकी ही एक प्रमुख मागणी होती. सकाळ-संध्याकाळ पूर्व-पश्चिम भागाला जोडणाऱ्या पादचारी भुयारी मार्गाच्या मुख्य मागणीसंदर्भात अद्याप निर्णय प्रलंबित आहे. यासंदर्भातील प्रस्ताव पश्चिम रेल्वे व्यवस्थापक कार्यालयात प्रक्रियेत असून, या आठवड्यात याबाबत बैठक घेऊन प्रस्ताव मंजूर करून घेण्याचे आश्वासनही खासदार हेमंत सवरा यांनी दिले. सफाळेकरांसाठी हे यशाचे पहिले पाऊल असून, भुयारी मार्गाच्या मान्यतेनंतर परिसरातील वाहतूक आणि सुरक्षेच्या सुविधा अधिक सुकर होणार आहेत. या कार्यक्रमात सफाळे विकास कृती समितीचे पदाधिकारी, उंबरपाडा-सफाळे, कर्दळ, माकणे ग्रामपंचायतींचे सरपंच, तसेच सफाळे व्यापारी असोसिएशन, डहाणू-वैतरणा सेवाभावी संस्थेचे पदाधिकारी उपस्थित होते.