रेशनिंगच्या धान्याची बेकायदा विक्री
खारघर, ता. १७ (बातमीदार) : कोपरा गावातील रेशन दुकानदाराकडून काळ्याबाजाराने धान्यविक्री होत आहे. त्यामुळे दुकानदारावर कारवाई कण्याची मागणी शिवसेनेचे उप शहर संघटक सिद्धेश ठाकूर यांनी पनवेल पुरवठा अधिकाऱ्यांकडे केली आहे.
खारघरमधील कोपरा गावात जाणू ठाकूर यांचे रेशन दुकान आहे. या दुकानात गोरगरिबांसाठीचे धान्य रेशन कार्डधारकांना वितरण होत नसल्याचा आरोप होत आहे. या धान्याचा काळाबाजार होत असल्याची तक्रार सिद्धेश ठाकूर यांनी केली आहे. तसेच अंधारात रेशन दुकानातील धान्याच्या गोणी भरून एका टेम्पोमधून पाठवल्या जात असल्याचा व्हिडिओ पुरवठा अधिकाऱ्यांकडे दिला आहे. त्यामुळे रेशन दुकानदारावर कारवाई करण्याची मागणी लेखी तक्रारीतून पुरवठा अधिकाऱ्यांकडे केली आहे. यासंदर्भात पुरवठा अधिकारी अश्विनी धनावडे यांनी तक्रारीवर तपास करून कारवाई केली जाईल, असे सांगितले.