पनवेल स्थानकात नवीन पार्किंग
पनवेल, ता.१३ (बातमीदार)ः पनवेल रेल्वे स्थानकालगत नवीन पनवेलच्या बाजूला वाहनांसाठी नवीन पार्किंग सुरू करण्यात आले आहे. नवीन पनवेल वेल्फेअर असोसिएशन, वाहतूक पोलिस विभाग यांच्या पुढाकारातून ही सुविधा पनवेकरांसाठी मिळाली आहे.
वाहतुकीची वाढती वर्दळ लक्षात घेता पार्किंगची समस्या गंभीर बनत आहे. याच अनुषंगाने वाहतूक निरीक्षक औदुंबर पाटील, माजी नगरसेवक मनोज भुजबळ आणि संदीप पाटील यांनी रेल्वे प्रशासनाशी समन्वय साधत नवीन पार्किंग सेवा सुरू केली आहे. हा उपक्रम नागरिकांसाठी अत्यंत उपयुक्त आणि समाजोपयोगी ठरणार आहे. तसेच नागरिकांनी वाहतुकीचे नियम काटेकोरपणे पाळावेत, असेही त्यांनी आवाहन केले. या सुविधेचे माजी खासदार रामशेठ ठाकूर यांच्याहस्ते नुकतेच लोकार्पण करण्यात आले.