१५ किमी खुल्या पाण्यात ठाण्याच्या दोन तरुणांची झंकारणारी झेप
ठाणे, ता. १८ (बातमीदार) : ठाण्याच्या दोन जलतरणपटूंनी १५ किमी खुल्या पाण्यातील स्पर्धेत उल्लेखनीय कामगिरी करत ठाण्याची मान उंचावली आहे. वर्तकनगरमधील रामचंद्र ठाकूर जलतरण तलावाचे रितुल पवार आणि आनंद गाडेकर यांनी ही गौरवास्पद कामगिरी केली आहे. श्री दुर्गामाता कला क्रीडा आणि संस्कृती मंडळ, विजयदुर्ग-२०२५ जिम स्विम अकादमी व रमणमाला, कोल्हापूर यांच्या संयुक्त विद्यमानाने राज्य हौशी जलतरण संघटना यांच्या नियमांनुसार ही स्पर्धा पार पडली.
पहिल्याच प्रयत्नात इतक्या मोठ्या अंतराची पूर्तता करणे हे दोघांच्या चिकाटी, शिस्त, सहनशक्ती आणि पाण्यातील कौशल्याचे प्रतीक आहे. कठोर प्रशिक्षण आणि योग्य नियोजनाच्या जोरावर त्यांनी हा आव्हानात्मक प्रवास यशस्वीपणे पूर्ण केला. विशेष म्हणजे खुल्या पाण्यातील हा त्यांचा पहिलाच अनुभव असूनही त्यांनी उत्कृष्ट प्रदर्शन करत स्पर्धेत लक्ष वेधले. या यशामागे प्रशिक्षक सुजल गमरे आणि रोहित पाटेकर यांच्या मार्गदर्शनाचा मोठा वाटा असल्याचे दोन्ही तरुणांनी नमूद केले. स्थानिक क्रीडाप्रेमी आणि जलतरणतज्ज्ञांनी या कामगिरीचे मनापासून कौतुक केले असून, ठाण्यातून राष्ट्रीय व आंतरराष्ट्रीय दर्जाचे जलतरणपटू उदयाला येण्याचा विश्वास व्यक्त केला जात आहे.