१०३ दुचाकींवर कारवाई
नवीन पनवेल, ता. १८ (बातमीदार)ः नवीन पनवेल रेल्वेस्थानकाच्या बाजूला बेकायदा १०३ दुचाकींवर पनवेल शहर वाहतूक पोलिसांनी सोमवारी (ता. १७) धडक कारवाई केली. या कारवाईमुळे नवीन पनवेल बाजूकडील रेल्वेस्थानकाकडे जाणाऱ्या रस्त्याने मोकळा श्वास घेतला आहे.
नवीन पनवेल परिसरातून हजारो प्रवासी रेल्वेने प्रवास करीत आहेत. या वेळी नोकरीला जाताना दुचाकी रेल्वेस्थानकाबाहेर नो पार्किंगमध्ये दुचाकी उभ्या केल्या जात असल्यामुळे वाहतूक कोंडी होत होती. या वेळी पनवेल शहर वाहतूक शाखेचे वरिष्ठ पोलिस निरीक्षक औदुंबर पाटील, माजी नगरसेवक मनोज भुजबळ, संदीप पाटील यांनी पनवेल रेल्वेस्थानकाचे मुख्य प्रबंधक यांच्याशी चर्चा करून भूखंड उपलब्ध करून घेतला, मात्र दुचाकीचालक अधिकृत पार्किंगमध्ये वाहने उभी करत नसल्यामुळे वाहतूक शाखेचे वरिष्ठ पोलिस निरीक्षक औदुंबर पाटील यांनी कारवाई केली आहे.