गर्दीचा फायदा उचलून चोरी करणारी महिला जेरबंद
१७ लाख ३८ हजार ५३३ हजारांचा ऐवज हस्तगत
सकाळ वृत्तसेवा
ठाणे, ता. १८ : लोकल प्रवासातील गर्दीत महिला प्रवाशांच्या खांद्यावरील पर्सची चेन खोलून त्यातील सोन्याचे दागिने लांबविणाऱ्या कोपर गावातील आरती दत्ता (३७) या महिलेला मुंबई लोहमार्ग पथकाने जेरबंद केले. तिच्याकडून कुर्ला आणि ठाण्यातील गुन्हे उघडकीस आले असून, त्यातील एकूण १७ लाख ३८ हजार ५३३ रुपयांचा मुद्देमाल हस्तगत करण्यात यश आले आहे.
कुर्ला आणि ठाणे रेल्वेस्थानकात ऑक्टोबर आणि नोव्हेंबर या महिन्यात घडलेल्या दोन घटनांची त्या-त्या पोलिस ठाण्यांमध्ये नोंद झाली होती. याचदरम्यान त्या गुन्ह्यांचा समांतर तपास सुरू केला. तपास पथकाने मस्जिद बंदर ते डोंबिवली रेल्वेस्थानक व आजूबाजूच्या परिसरातील सीसीटीव्ही फुटेजची तपासणी केली असता, एक संशयित महिला दोन्ही गुन्ह्यातील घटनास्थळी हजर असल्याची बाब निदर्शनास आली. त्यानुसार त्या महिलेला राहत्या घरातून ताब्यात घेण्यात आले चौकशीत तिने दोन्ही गुन्ह्यांची कबुली दिल्यावर तिला अटक केली आहे.