काळा किल्ला आगारातून बेस्‍टच्‍या फेऱ्या वाढवा!
धारावीतील ज्‍येष्‍ठ नागरिकांची मागणी
धारावी, ता. १८ (बातमीदार) : धारावी, काळा किल्ला आगारातून सुटणाऱ्या बेस्‍टच्‍या फेऱ्या वाढवाव्यात, अशी मागणी ज्‍येष्‍ठ नागरिकांनी केली आहे.
फेस कॉम संलग्न हॅपिनेस्ट ज्येष्ठ नागरिक संघ धारावी व झेंडा ग्रुप धारावी यांनी ज्येष्ठांच्या सह्यांचे निवेदन बेस्ट व्यवस्थापक काळा किल्ला धारावी आगार व महाव्यवस्थापक बेस्ट हाउस कुलाबा यांना दिले आहे. १० मिनिटांच्या अंतराने बस सोडाव्यात, अशी मागणी करण्यात आली आहे.
धारावी काळा किल्ला बेस्‍ट बस आगारामधून सुटणाऱ्या बस क्रमांक ५२, ४६, १६४, १७६ सी, ७२ तसेच ३०५,३१२,४६३ या खूप उपयुक्त ठरत आहेत, पण या बससेवा वेळेवर नसल्यामुळे त्याचा तोटा बस प्रवाशांना होतो. याचा लाभ खासगी वाहतूकदारांना होत आहे. बेस्ट व्यवस्थापकडे बसेस कमी असल्यामुळे ज्येष्ठ नागरिक व इतर प्रवाशांचे नुकसान होते. बेस्टचे नियोजन बिघडल्याने याचा नाहक त्रास बस प्रवाशांना सोसावा लागत आहे. बस प्रवाशांमध्ये ज्येष्ठ नागरिक, महिला, विद्यार्थी, कामगारांमध्ये बेस्ट उपक्रमाबद्दल तीव्र नाराजी निर्माण झाली आहे. येत्या काही दिवसांत बेस्‍ट वेळापत्रकाचे व्यवस्‍थित नियोजन न केल्‍यास आंदोलन केले जाईल, असा इशारा हॅपीनेस ज्येष्ठ नागरिक संघाचे संपर्कप्रमुख दिलीप गाडेकर, झेंडा ग्रुप धारावी यांचे प्रतिनिधी परशुराम जाधव, विष्णू कटके यांनी दिला आहे.