रस्त्यावरच्या १६ घटनांचे रांगोळीत दर्शन
ठाण्यात रंगावलीचे अनोखे प्रदर्शन
ठाणे, ता. १९ (बातमीदार) : रस्त्यावर घडणाऱ्या छोट्या-छोट्या प्रसंगांना कला माध्यमातून जीवन दिले जात आहे. चंपाषष्ठी उत्सवानिमित्ताने श्री आनंद भारती समाज आणि कलाछंद रांगोळीकार कलाकारांनी १६ व्या रंगावली प्रदर्शनात रस्त्यावरील १६ घटना रांगोळीच्या माध्यमातून साकारल्या आहेत.
हे प्रदर्शन २६ नोव्हेंबरपर्यंत संध्याकाळी ५ ते ९ वाजेपर्यंत विनामूल्य पाहता येणार आहे. क्रिकेटपटू व सिनेकलावंत संदीप जुवाटकर यांच्या हस्ते या कलाकृतींचे उद्‍घाटन करण्यात आले. जुवाटकर यांनी या रांगोळ्याचे कौतुक केले. संस्थेचे अध्यक्ष हरेश्वर मोरेकर आणि कलाछंद रांगोळीकार मंडळाचे अध्यक्ष सुभाष शाक्यवार उपस्थित होते. या प्रदर्शनामुळे रस्त्यावर रोज घडणाऱ्या क्षणांना कलात्मक स्वरूप मिळाले असून, स्थानिक नागरिकांना कला आणि समाज जीवन याचा सुंदर अनुभव मिळत आहे.

‘या’ प्रदर्शनात क्षणांना कलात्मक स्वरूप
या प्रदर्शनाची सुरुवात १२ वर्षीय नियती मुकादम हिने प्रथमच रेखाटलेल्या श्री गणेशाय नमः रांगोळीने झाली. या प्रदर्शनात रजन शिरोडकर यांची मासे विकणारी कोळीण, हिंदवी तरे यांचे भयभीत झालेली मुलगी, निलेश कोळी यांचे महिला मजूर, उमेश सुतार यांचा मुंबईचा डबेवाला, अमित सावंत यांचा रस्त्यावर भविष्य सांगणारा ज्योतिष, सुभाष शाक्यवार यांची फुगे-खेळणी विकणारी मुलगी आणि माकडवाला मदारी, बबन राणे यांचे इडली-मेदुवडा विक्रेते, अनिरुद्ध जाधव, योगेश भामणे, गोविंद सोनवणे यांचे भाजी व फळ विक्रेते, मयंक थोरात यांचा चहावाला आणि सुनील मोरे यांचा नंदी बैलवाला यासारख्या व्यक्तिरेखा रांगोळीतून पाहायला मिळतात.