हार्बर रेल्वेची सेवा विस्कळित
प्रवाशांची गैरसोय

सकाळ वृत्तसेवा
मुंबई, ता. १९ : हार्बर मार्गावरील वडाळा रेल्वेस्थानकाजवळ बुधवारी दुपारी पॉइंट फेल झाल्याने लोकल वाहतूक जवळपास अर्ध्या तासापेक्षा जास्त वेळ विस्कळित झाली. त्यामुळे वडाळा ते वांद्रे-गोरेगाव हार्बर मार्गावरील लोकल एकामागोमाग एक थांबल्या होत्या. परिणामी मध्य रेल्वेला तीन लोकल फेऱ्या रद्द कराव्या लागल्या. अनेक गाड्यांना मोठा विलंब झाल्याने प्रवाशांना प्रचंड मनस्ताप सहन करावा लागला.
मध्य रेल्वेने दिलेल्या माहितीनुसार, दुपारी २ वाजून ६ मिनिटांच्या सुमारास वडाळा स्थानकाच्या प्लॅटफॉर्म क्रमांक १ वर पॉइंट फेल झाला. त्यानंतर काही मिनिटांतच हार्बर मार्गावरील सीएसएमटी ते वांद्रे आणि गोरेगावकडे जाणाऱ्या लोकल खोळंबल्या होत्या. घटनेची माहिती मिळताच अभियांत्रिकी पथक तातडीने घटनास्थळी दाखल झाले. त्यांनी दोष शोधून दुरुस्तीचे काम सुरू केले. जवळपास अर्धा तास चाललेल्या प्रयत्नांनंतर दुपारी २ वाजून ३५ मिनिटांनी बिघाड दुरुस्त करण्यात आला आणि लोकल वाहतूक हळूहळू पूर्ववत करण्यात आली. मात्र या काळात सीएसएमटी, वडाळा आणि वांद्रे स्थानकांवर प्रवाशांची मोठी गर्दी झाली. लोकल उशिरा धावत असल्यामुळे अनेकांना गर्दीतून प्रवास करावा लागला. काही प्रवाशांनी वारंवार होणाऱ्या बिघाडांवर नाराजी व्यक्त करीत मध्य रेल्वेने देखभाल-दुरुस्तीसाठी अधिक काटेकोर नियोजन करण्याची मागणी केली.