‘वैतागवाडी’त मंदिर निर्माणाचा ठराव एकमताने मंजूर
विक्रमगड, ता. १९ (बातमीदार) : विक्रमगड तालुक्यातील खुडेद ग्रामपंचायत अंतर्गत येणाऱ्या पेसा गाव वैतागवाडी येथे, ग्रामस्थांची कुलदैवत असलेल्या याहा मोगी (देवमोगरा) मातेच्या नवीन मंदिराच्या निर्माणाचा महत्त्वपूर्ण ठराव नुकत्याच झालेल्या ग्रामसभेत एकमताने मंजूर करण्यात आला.
नंदा संदीप पाटारा यांच्या अध्यक्षतेखाली ही ग्रामसभा आयोजित करण्यात आली होती. आदिवासी बांधवांची श्रद्धा आणि सांस्कृतिक ओळख जतन करणारे सुसज्ज मंदिर उभारणे हा यामागील उद्देश आहे. मंदिराच्या उभारणीसाठी गावकऱ्यांनी श्रमदान आणि आर्थिक योगदान देण्याचा निर्धार केला आहे. यासाठी त्वरित एका ‘मंदिर निर्माण समिती’ची स्थापना करण्यात आली असून, त्यात गावातील युवक, प्रतिष्ठित नागरिक आणि महिलांचा समावेश आहे. समिती आता मंदिराचा आराखडा आणि खर्चाचे नियोजन तयार करेल. तसेच, निधी आणि प्रशासकीय परवानगीसाठी जिल्हाधिकारी कार्यालय आणि आदिवासी विकास विभागाकडे रीतसर अर्ज सादर करण्यात येणार आहे. भारत पाटारा यांनी गावकऱ्यांच्या एकजुटीबद्दल आभार व्यक्त करत, हे मंदिर आदिवासी संस्कृतीचे केंद्र बनेल, असा विश्वास व्यक्त केला. या निर्णयामुळे वैतागवाडी आणि पंचक्रोशीतील आदिवासी बांधवांमध्ये उत्साहाचे वातावरण निर्माण झाले आहे.