कल्याणचा गड मजबूतच
७०० महिला पदाधिकाऱ्यांसह संघटन मजबुतीवर भर
डोंबिवली, ता. २० : कल्याण डोंबिवली महापालिका निवडणुकीच्या पार्श्वभूमीवर शिवसेना शिंदे गटाने आपले संघटन मजबूत करण्यावर लक्ष केंद्रित केले आहे. याचाच भाग म्हणून, बुधवारी (ता. १९) सायंकाळी पदाधिकाऱ्यांची एक बैठक घेऊन कल्याण पूर्वेमध्ये शेकडो नवीन पद नियुक्त्या करण्यात आल्या आहेत.

शिवसेनेचे जिल्हाप्रमुख गोपाळ लांडगे यांच्या नेतृत्वाखाली ही बैठक पार पडली. या बैठकीत एकूण शेकडो पदाधिकाऱ्यांच्या नियुक्त्या करण्यात आल्या. यात विशेषतः शिवसेना महिला आघाडीच्या सुमारे ७०० पदाधिकाऱ्यांचा समावेश आहे. मोठ्या संख्येने महिला पदाधिकाऱ्यांची नियुक्ती करून संघटनात्मक बांधणी अधिक मजबूत करण्याचा प्रयत्न शिंदे गटाकडून करण्यात आला आहे.

जिल्हाप्रमुख गोपाळ लांडगे यांनी या नियुक्त्यांबद्दल स्पष्टीकरण दिले की, पूर्वी काही पदाधिकाऱ्यांची नियुक्ती झाली होती, परंतु काही जण अनुपस्थित होते. तसेच, नवीन पॅनेल पद्धतीमुळे झालेल्या वाढीनुसार आज कल्याण पूर्वेत पदांचे वाटप करण्यात आले आहे. लांडगे यांनी आगामी महानगरपालिका निवडणुकीत विजयाचा दावा केला आहे. ते म्हणाले की, कार्यकर्ते नेहमीच काम करत असतात आणि निवडणूक जाहीर झाल्याने सर्वजण जोमाने कामाला लागले आहेत.

विकासकामे प्रगतिपथावर
निवडणुकीत निश्चितपणे आधीपेक्षा जास्त जागा निवडून येतील, असा मला विश्वास आहे. उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या नेतृत्वात अनेक विकासकामे प्रगतिपथावर आहेत. लोकांना विकास हवा आहे. त्यामुळे शिवसेनेला यश मिळेल, असे मत लांडगे यांनी व्यक्त केले.

पक्षांतराच्या चर्चा निरर्थक
कल्याण डोंबिवली महापालिका क्षेत्रातील शिवसेना शिंदे गटाच्या पदाधिकारी कार्यकर्त्यांना पक्षप्रवेश देऊन भाजपने ऑपरेशन लोटस राबवले. मुंबईत मुख्यमंत्री देवेंद्र फडणवीस यांच्यासोबत झालेल्या बैठकीमध्ये यानंतर महायुतीतील अंतर्गत पक्षामध्ये फूट पाडायची नाही असे ठरले आहे. मात्र तरीही कल्याणमध्ये शिवसेना शिंदे गटाचे काही पदाधिकारी माजी नगरसेवक भाजपमध्ये जाणार असल्याची जोरदार चर्चा समाज माध्यमांवर सुरू होती. यासंबंधीचे वृत्त प्रसिद्ध झाल्यानंतर शिवसेना शिंदे गटाचे मल्लेश शेट्टी यांचे कार्यकर्ते आणि नवीन गवळी यांचे कार्यकर्ते यांनी या सर्व चर्चा निरर्थक असल्याचा दावा केला आहे. उपमुख्यमंत्री एकनाथ शिंदे, खासदार डॉ. श्रीकांत शिंदे यांनी विश्वास दाखवून संघटन वाढीची जबाबदारी दिली आहे. असे असताना पक्ष सोडून भाजपामध्ये जाण्याचा प्रश्नच येत नसून कल्याण मध्ये शिवसेना शिंदे गटाचा गड मजबूत असल्याचा दावा करण्यात येत आहे.