टिटवाळ्यातील भाजप कार्यकर्ते शिवसेनेमध्ये
मातोश्रीवर पक्षप्रवेश, पक्ष नेतृत्वाबद्दल नाराजी

टिटवाळा, ता. २१ (वार्ताहार) : भाजपमध्ये सुरू असलेल्या ‘इनकमिंग’मुळे स्थानिक पातळीवर नाराजी व्यक्त होत आहे, तर काही जुन्या कार्यकर्त्यांनी पक्षत्याग केला आहे. काही नाराजांनी शिवसेना (उद्धव ठाकरे) पक्षात प्रवेश केला आहे.
टिटवाळ्यातील प्रदीप भोईर (कल्याण जिल्हा सचिव), तसेच सुरेश भोईर (माजी नगरसेवक आणि महाराष्ट्र राज्य परिषद सदस्य), यांच्यासह शेकडो कार्यकर्त्यांनी पक्ष नेतृत्वाबद्दल नारजी व्यक्त केली आहे. पक्षात दिल्या जाणाऱ्या ‘डायरेक्ट एन्ट्री’, जुन्या कार्यकर्त्यांना न मिळणारा मान आणि स्थानिक राजकीय समीकरणांकडे दुर्लक्ष, या कारणांमुळे त्यांनी मोठा निर्णय घेतला. प्रदीप भोईर, सुरेश भोईर आणि त्यांच्या समर्थकांनी शुक्रवारी (ता. २१) शिवसेना (उद्धव ठाकरे) पक्षात, मातोश्री येथे प्रवेश केला. या वेळी शिवसेनेचे उपनेते विजय बंड्या साळवी, शहरप्रमुख बाळा परब, उपशहरप्रमुख किशोर शुक्ला यांसह अनेक पदाधिकारी आणि कार्यकर्ते मोठ्या संख्येने उपस्थित होते. या प्रवेशामुळे टिटवाळ्यासह कल्याण तालुक्यातील राजकीय समीकरणांमध्ये मोठी उलथापालथ होण्याची शक्यता आहे.
--
पक्ष सोडताना त्रास होतो
भाजपचे कल्याण जिल्हा सचिव टिटवाळ्यातील प्रदीप भोईर यांनी प्रसारमाध्यमांना सांगितले की, ‘‘गेली ५० वर्षांहून अधिक काळ माझ्या वडिलांसह आम्ही भाजपशीच एकनिष्ठ राहिलो. पक्ष सोडताना त्रास निश्चित होत आहे, मात्र यापुढे उद्धव ठाकरे यांच्या नेतृत्वाखाली आपण शिवसेनेसाठी काम करणार असून, या वेळी आमचे पॅनेलचे सगळे उमेदवार निवडून आणू.’’