माजी नगरसेवकाचे नाव वगळले
ठाणे पालिकेच्या प्रारुप यादीत सुधीर भगत यांचे नाव गायब

सकाळ वृत्तसेवा
ठाणे, ता. २१ : विधानसभा निवडणुकीत मतदान केलेल्या माजी नगरसेवकाचे नाव मतदार यादीतून गायब झाल्याची बाब समोर आली आहे. ठाणे महापालिकेच्या निवडणूक विभागाकडून प्रारूप मतदार यादी गुरुवारी (ता. २०) प्रसिद्ध झाली. यात मुंब्य्रातील माजी नगरसेवक सुधीर भगत यांचे नाव नसल्याचे त्यांनी निवडणूक विभागाकडे हरकत नोंदविली आहे. आपल्याला न्याय मिळाला नाही, तर अपिलात जाणार असल्याचा इशारा त्यांनी दिला आहे.
सुधीर भगत यांचे मुंब्य्रातील मतदार यादीत नाव होते. त्यानुसार त्यांनी विधानसभा निवडणुकीत मतदान केले, परंतु यादीतून त्यांचेच नाव बाद झाले आहे. त्यांच्याच नावाची एक व्यक्ती कळवा भागात वास्तव्यास असून, त्याने अशा पद्धतीने महापालिकेकडे दुबार नावाची तक्रारी केली होती, अशी माहिती आता सुधीर भगत यांना महापालिकेकडून मिळाली आहे. त्या व्यक्तीने तक्रार केल्यानंतर त्याच्याकडून यादीतून नाव वगळण्यासाठीचा अर्ज क्रमांक ७ भरून घेत, थेट नाव गायब केले आहे. हे नाव उडविण्यापूर्वी निवडणूक विभागाने विचारणा करणे अपेक्षित होते. त्यांच्याकडून चौकशी होणे अपेक्षित होते. किमान बीएलओला पाठवून त्यांनी याची माहिती घेणे अपेक्षित होते, परंतु तसे काही न करता थेट नाव वगळण्यात आल्याचा दावा भगत यांनी केला आहे. तसेच आपण विधानसभा निवडणुकीत शरद पवार गटाचे आमदार जितेंद्र आव्हाड यांना मदत केल्यानेच आपले नाव वगळण्यात आल्याचा आरोपही त्यांनी केला आहे.