ठाणे रेल्वेस्थानकामधील सुरक्षा वाऱ्यावर!
ठाणे, ता. २३ : ठाणे रेल्वेस्थानकातून दररोज प्रवास करणाऱ्या सहा ते सात लाख प्रवाशांच्या तुलनेत लोहमार्ग (रेल्वे) पोलिस ठाण्याचे मनुष्यबळ अतिशय तोकडे आहे. १९९२मध्ये पोलिस ठाणे सुरू करताना मंजूर केलेल्या पदांमध्ये वाढ झाली नसल्याने आजही त्याच अपुऱ्या फौजेवर सुरक्षेचा भार आहे.
सध्या एका पोलिसाच्या खांद्यावर जवळपास पाच ते सहा हजार प्रवाशांच्या सुरक्षिततेची जबाबदारी आहे. ठाणे लोहमार्ग पोलिस ठाण्याची हद्द दिवा, कळंबोली आणि हार्बरवरील दिघा स्थानकापर्यंत पसरली असून, या मोठ्या क्षेत्रासाठी केवळ आठ अधिकारी आणि १६० पोलिस कर्मचारी आहेत. वाढत्या प्रवासीसंख्येमुळे पोलिसांवरील कामाचा ताण प्रचंड वाढला आहे. मनुष्यबळ वाढवण्याची मागणी वारंवार करूनही पदे वाढलेली नाहीत. ही परिस्थिती अशीच राहिल्यास भविष्यात सुरक्षिततेचा प्रश्न अधिक गंभीर होऊन पोलिस कर्मचारी जबाबदारीच्या ओझ्याखाली भरडले जातील, अशी भीती व्यक्त केली जात आहे.