चांगले नागरिक होण्यासाठी संविधानचा अभ्यास आवश्यक : राजीव पाटील
विरार, ता. २५ (बातमीदार) : चांगले नागरिक घडवण्यासाठी धार्मिक ग्रंथांइतकाच भारताच्या संविधानाचा अभ्यास अत्यावश्यक आहे, असे मत वसई-विरार महापालिकेचे माजी महापौर राजीव पाटील यांनी व्यक्त केले. पद्मश्री रमेश पतंगे लिखित ''आपले संविधान'' या पुस्तकाच्या मराठी आणि इंग्रजी आवृत्तीचे प्रकाशन बुधवारी (ता. २६) विरारच्या यश विद्या निकेतन ग्लोबल स्कूल येथे होणार आहे. यावेळी मुंबई विद्यापीठाचे माजी कुलगुरू डॉ. संजय देशमुख आणि अॅड. सुरेश कामत यांचे मार्गदर्शन लाभणार आहे. ही माहिती देण्यासाठी आयोजित पत्रकार परिषदेत ते बोलत होते.
गीतेसारख्या धर्मग्रंथांइतकेच संविधानाला महत्त्व आहे, पण दुर्दैवाने कायदेपंडितांव्यतिरिक्त सामान्य पदवीधरांनाही त्याची परिपूर्ण माहिती नाही. संविधानाच्या अभ्यासामुळे विद्यार्थ्यांना त्यांचे अधिकार कळतील आणि एक चांगली पिढी घडण्यास मदत होईल, असे मत पाटील यांनी व्यक्त केले. ही बाब लक्षात घेत यश विद्या निकेतन शाळेने आठवीपासून संविधानाचा अभ्यासक्रमात समावेश केला असल्याचे पाटील यांनी सांगितले.
प्रकाशन सोहळ्यानिमित्त संविधान विषयावर विद्यार्थ्यांसाठी स्पर्धा आयोजित करण्यात आली आहे, ज्यात २१ शाळांमधील १४८ विद्यार्थ्यांनी भाग घेतला आहे. पुस्तक प्रकाशनानंतर मराठी आणि इंग्रजी भाषेत वक्तृत्व, निबंध, पोस्टर बनवणे आणि न्यूज अँकरिंगची स्पर्धा घेण्यात येणार आहे, अशी माहिती डॉ. अर्चना कुलकणी यांनी या वेळी दिली.