पदपथावरील कचऱ्याने नागरिक त्रस्त
जुईनगर (बातमीदार) ः नेरूळ सेक्टर १० येथील पदपथावर कचरा, नारळाच्या झावळ्यांमुळे स्थानिकांना प्रचंड त्रास सहन करावा लागत आहे. संपूर्ण पदपथ झाकला गेल्याने नागरिकांना रस्त्यावरून चालण्याची वेळ आली आहे.
नेरूळ पश्चिम परिसराचा सेक्टर १० आणि २० मधील प्रमुख रस्ता आहे. या परिसरात मोठ्या प्रमाणात नागरिकांची वर्दळ असते. या पदपथावरूनच नागरिकांना ये-जा करावी लागते. या ठिकाणी नारळाच्या झावळ्या टाकण्यात आल्या आहेत. तसेच लोकांनी कचरा टाकला असल्याने परिसरात दुर्गंधी पसरली आहे. त्यामुळे लवकरात लवकर हा कचरा उचलण्याची मागणी स्थानिक नागरिकांनी केली आहे. या परिसरात नियमित सफाई कर्मचारी सफाई करतात. तरीसुद्धा कचऱ्याकडे दुर्लक्ष केले जात असल्याने पालिकेविरोधात नाराजी आहे.