रुग्णालयांची अवस्था वाईट ठेवून खासगीकरणाचा घाट
खासदार गायकवाड यांचा आरोप
सकाळ वृत्तसेवा
मुंबई, ता. २५ ः पालिकेच्या रुग्णालयांची अवस्था जाणीवपूर्वक खराब ठेवून त्यांचे खासगीकरण करण्याचा घाट घातला जात आहे, असा गंभीर आरोप मुंबई काँग्रेस अध्यक्ष खासदार वर्षा गायकवाड यांनी केला आहे. मुंबईतील सर्व सरकारी रुग्णालयांच्या कामकाजाची संपूर्ण चौकशी करण्याची मागणी त्यांनी केली आहे. सांताक्रूझ येथील व्ही. एन. देसाई रुग्णालयाला त्यांनी भेट दिली.
खासदार गायवाड म्हणाल्या, की महापालिका रुग्णालयात गरीब कुटुंबांतील रुग्ण येतात. रुग्णांना बेड उपलब्ध असूनही त्यांना रुग्णालयाच्या पॅसेजमध्ये झोपायला लावणे अशा अनेक गोष्टी माझ्या नजरेस आल्या. रुग्णालयातील अनेक खोल्या, स्वच्छतागृहे एक वर्ष बंद करून ठेवण्यात आली आहेत. गळणारे छप्पर, तुंबलेले शौचालय, पाण्याचा अभाव यामुळे रुग्ण व त्यांचे नातेवाईक महिलांना जास्त त्रासाला सामोरे जावे लागत असल्याचे त्यांनी म्हटले आहे.
पालिकेच्या रुग्णालयांची काय अवस्था आहे, हे पाहण्यासाठी महापालिका आयुक्तांनी स्वतः उपनगरीय रुग्णालयांना भेट दिली पाहिजे. रुग्णालयात सोयी-सुविधा आहेत का, रुग्णांना कोणत्या अवस्थेत ठेवले जात आहे, हे त्यांनी पाहावे. आम्ही वारंवार तक्रारी करूनदेखील गोष्टी का सुधारल्या जात नाहीत? रुग्णालयांतील गलिच्छ अवस्थेसाठी मुंबई महापालिकाच जबाबदार आहे. कोट्यवधी रुपयांचे आरोग्य विभागाचे बजेट असताना तो पैसा कोणाच्या खिशात जातो, याची चौकशी झाली पाहिजे आणि तातडीने रुग्णालयात उपाययोजना केल्या पाहिजेत, अशी मागणी खासदार गायकवाड यांनी केली आहे.
---------------