उपआरोग्य केंद्रासाठी अधिकाऱ्यांना साकडे
नेरूळ (बातमीदार) ः नेरूळ सेक्टर १६ मधील छत्रपती संभाजीराजे उद्यानात उपआरोग्य केंद्र सुरू करण्याची लेखी मागणी भाजपच्या माजी नगरसेविका रूपाली भगत यांनी कुकशेत नागरी आरोग्य केंद्राच्या आरोग्य अधिकाऱ्यांकडे केली आहे.
नेरूळ सेक्टर १६, १६ ए हा परिसर पाम बीच मार्गालगतचा परिसर आहे. या विभागात डासांच्या उद्रेकाने बाराही महिने साथीचे रुग्ण आढळतात. येथील रहिवाशांना पालिकेच्या आरोग्यसेवेच्या सुविधांसाठी नेरूळ गाव अथवा कुकशेत गाव येथे जावे लागते. त्यामुळे सेक्टर १६ मधील छत्रपती संभाजीराजे उद्यान व १६ ए मधील १२२ ए, गणपती गल्ली मार्ग महापालिकेच्या उद्यानामध्ये उपआरोग्य केंद्र सुरू करणे आवश्यक आहे.