किसन कथोरे यांचा अंबरनाथमध्ये हल्लाबोल
अंबरनाथ, ता. २९ (वार्ताहर): अंबरनाथ नगरपालिका निवडणुकीला काही दिवस शिल्लक असताना शहरातील राजकीय वातावरण चांगलेच तापले आहे. प्रचाराच्या शेवटच्या टप्प्यात भारतीय जनता पक्षाच्या नगराध्यक्ष पदाच्या अधिकृत उमेदवार तेजश्री करंजुळे-पाटील यांच्या प्रचारार्थ आयोजित केलेल्या जाहीर सभेत मुरबाड विधानसभेचे आमदार किसन कथोरे यांनी जोरदार हल्लाबोल केला.

आमदार कथोरे यांनी नागरिकांची भावना व्यक्त करताना म्हटले की "अंबरनाथकर म्हणतात आता बस्स! आम्हाला स्वातंत्र्य द्या..." अशा स्पष्ट शब्दांत विरोधकांवरील नाराजीला वाचा फोडली. शहराच्या विकासाला योग्य गती देण्यासाठी सक्षम नेतृत्वाची नितांत गरज असल्याचे सांगत, त्यांनी भाजप उमेदवार तेजश्री करंजुळे-पाटील यांना मोठ्या मताधिक्याने विजयी करण्याचे आवाहन उपस्थितांना केले.

२ डिसेंबर रोजी मतदान आणि ३ तारखेला मतमोजणी असल्याने, सर्वच राजकीय पक्षांनी प्रचार मोहीम धडाकेबाज सुरू ठेवली आहे. रॅली, जाहीर सभा आणि घरोघरी संपर्क मोहिमेतून प्रचाराची रणधुमाळी शिगेला पोहोचली आहे.या पार्श्वभूमीवर आयोजित केलेल्या सभेला नागरिकांचा उत्स्फूर्त प्रतिसाद मिळाला. यावेळी माजी नगराध्यक्ष गुलाबराव करंजुळे पाटील, उमेदवार तेजश्री करंजुळे-पाटील, कार्यकर्ते आणि पदाधिकारी मोठ्या संख्येने उपस्थित होते.