खोदकामांमुळे अडथळ्यांची शर्यत
उलवे, ता. १ (बातमीदार) : नवी मुंबईतील उलवे परिसरातील रस्त्यांची परिस्थिती दिवसेंदिवस बिकट झाली आहे. विशेषतः सेक्टर २४, २५, २५ ए, १९, २३ यांसह अनेक सेक्टरमध्ये रस्ते खोदलेले असल्याने प्रवास करणे कठीण झाले आहे.
महापारेषण कंपनीचे काम, तर कधी पाणीपुरवठा विभागाच्या जलवाहिनीच्या कामांमुळे रस्त्यांचे खोदकामे सुरू आहेत. परिणामी, अनेक ठिकाणी खड्डे, चिखल, पाणी साचून वाहनचालकांच्या अडचणींमध्ये वाढ होत आहे. रस्त्यात सर्वत्र उघड्या खड्ड्यांचे जाळे असल्याने दोनचाकी वाहनचालकांना संतुलन राखणे कठीण होत आहे. रात्रीच्या वेळेला प्रकाशयोजना नसल्याने दिसत नाहीत. त्यामुळे अपघातांची संख्या वाढली आहे. काही रहिवासी किरकोळ जखमी झाले आहेत. रहिवाशांनी संबंधित विभागांना अनेक वेळा तक्रारी केल्या असूनही कामांचा प्रत्यक्ष वेग मंदावलेला आहे.