कुर्ल्यातील शाळेची मान्यता रद्द करण्याची शिफारस
घाटकोपर, ता. १ (बातमीदार) : मुंबई महापालिकेच्या शिक्षण विभागाने कुर्ल्यातील मायकेल हायस्कूल या शाळेची मान्यता रद्द करण्याची शिफारस पुणे येथील प्राथमिक शिक्षण संचालनालयाचे संचालक यांच्याकडे केली आहे. उच्च न्ययलयाचे ॲड. डॉ. वेदप्रकाश तिवारी यांनी दाखल केलेल्या माहिती अधिकारात (आरटीआय) ही बाब उघड झाली आहे. पालिका शिक्षण अधिकारी सुजाता खैरे यांनी याबाबत पुण्यातील शिक्षण संचालकांना पत्र पाठवले आहे.
उत्तर मुंबई शिक्षण निरीक्षक कार्यालयाच्या तपासणीत शाळेच्या विरोधात गंभीर अनियमितता आढळल्या आहेत. विद्यार्थीसंख्येचे नियम (कोड १३.१) न पाळणे. उपलब्ध सुविधांच्या तुलनेत विद्यार्थ्यांना प्रवेश न देणे, ज्यामुळे आरटीई नियम, २०११ (नियम १९) चे उल्लंघन झाले आहे. नियम २३ (१) अंतर्गत किमान पात्रता नसलेल्या शिक्षकांची नियुक्ती करणे अशा अनियमितता आढळून आल्या आहेत. तसेच निधी गैरव्यवहारासंदर्भात धर्मादाय आयुक्त कार्यालयात या शाळेविरुद्ध एक प्रकरण प्रलंबित आहे, ज्यात डॉ. तिवारी हे मुख्य तक्रारदार आहेत.
दरम्यान, याबाबत पालिका शिक्षण अधिकारी सुजाता खैरे यांच्याशी संपर्क साधला असता त्यांनी सांगितले की, याबाबत माहिती घ्यावी लागेल. कारण अशा शाळांची शिक्षण संचालकांकडे बरीच मोठी यादी पाठवली आहे.