जिल्हाधिकारी कार्यालयाची डिजिटल वाटचाल
८७ टक्के कर्मचारी ई-ऑफिस प्रणालीवर पूर्णपणे कार्यरत
अलिबाग, ता. २ (वार्ताहर) ः डिजिटल युगाची कास धरून शासनही आता कामकाजात बदल करीत डिजिटल कामकाजाला प्राधान्य देत आहे. याचाच एक भाग म्हणून रायगडच्या जिल्हाधिकारी कार्यालयात संगणकीय साधनांचा प्रशासकीय यंत्रणेने प्रभावी वापर सुरू ठेवला आहे. कार्यालयातील एकूण १६ अधिकारी आणि ५५ कर्मचाऱ्यांना दिलेले लॅपटॉप व संगणक नियमित वापरात असल्याची माहिती प्रशासनातून मिळाली.
गेल्या काही महिन्यांत बदली झालेल्या सर्व अधिकाऱ्यांनी त्यांना वितरित केलेले लॅपटॉप नियमाप्रमाणे परत केलेले आहेत. कार्यालयातील एकूण कामगारांपैकी ८७ टक्के कर्मचारी ई-ऑफिस प्रणालीवर पूर्णपणे कार्यरत असून, उर्वरित कर्मचाऱ्यांना प्रशिक्षण प्रक्रिया सुरू आहे. ई-ऑफिसच्या माध्यमातून कागदविरहित प्रशासनाचा प्रयत्न सुरू असून, बहुतांश नोंदी डिजिटल स्वरूपात हाताळल्या जात आहेत. आगामी काळात उर्वरित १३ टक्के कर्मचाऱ्यांनाही संपूर्णपणे ई-ऑफिसवर आणण्याचे नियोजन सुरू आहे. तसेच नवीन तंत्रज्ञान, क्लाऊड स्टोरेज, डेटा सुरक्षा याबाबत अतिरिक्त प्रशिक्षण देण्याच्याही हालचाली सुरू आहेत.
.................
चौकट :
‘इक्विपमेंट मॅनेजमेंट’ प्रणाली
जिल्ह्यातून प्रत्येक ठिकाणी ‘इक्विपमेंट मॅनेजमेंट’ प्रणाली योग्यरीत्या हाताळली जात आहे. त्यामुळेच प्रशासनाकडून कोणत्याच अधिकाऱ्यांविषयी तक्रार करण्यात आलेली नाही. प्रत्येक अधिकाऱ्याने नियमानुसार लॅपटॉप परत केले असून, प्रलंबित परतावा शून्य असल्याचे जिल्हाधिकारी कार्यालयातून सांगण्यात आले.
..............
प्रशासकीय कामात वेग आणि कार्यक्षमतेत वाढ : लॅपटॉप-संगणकांचा प्रभावी वापर आणि ई-ऑफिसची अंमलबजावणी यामुळे फाइल प्रक्रियेचा वेग वाढला. निर्णय प्रक्रिया जलद झाली. कागदाचा वापर घटल्याने खर्चात बचतही होत आहे. फाइल ट्रॅकिंग सुलभ झाले.
............
चौकट :
कागदी फाइल्सची संख्या कमी
ई-ऑफिसमुळे कागदी फाइल, नस्ती यांचे प्रमाण मोठ्या प्रमाणात घटले आहे. फाइलची हालचाल, मंजुरी, निरीक्षण आणि शासकीय नोंदींचे देखभाल सर्व डिजिटल माध्यमातून होत असल्यामुळे कामकाजाची गती वाढली. विभागांतील समन्वय अधिक सुरळीत झाला आहे.