शैक्षणिक संस्थांना रामशेठ ठाकूर यांच्याकडून ३५ लाख देणगी
पनवेल ता. ४ ( बातमीदार)ः ग्रामीण भागातील विद्यार्थ्यांना सुसज्ज शैक्षणिक सुविधा उपलब्ध करून देण्यासाठी माजी खासदार रामशेठ ठाकूर यांनी ३५ लाख रुपयांची देणगी दिली आहे. या योगदानामुळे सिन्नर तालुक्यातील दोन प्रमुख शैक्षणिक संस्थांच्या पायाभूत सुविधा विकासाला मोठी चालना मिळणार आहे.
रयत शिक्षण संस्थेचे व्यवस्थापन समिती सदस्य म्हणून कार्यरत असलेल्या रामशेठ ठाकूर यांनी ठाणगाव येथील पुंजाजी रामजी भोर विद्यालय आणि डॉ. अण्णासाहेब शिंदे कनिष्ठ महाविद्यालयाला २५ लाख रुपये देणगी देण्यात आली आहे. ही देणगी नवीन इमारत बांधकामासाठी प्रदान करण्यात आली. त्याचबरोबर पांगरी येथील श्री संत हरीबाबा विद्यालयासाठी आणखी १० लाख रुपये देऊन एकूण देणगी ३५ लाखांच्या घरात पोहोचली आहे. या वेळी पुंजाजी रामजी भोर विद्यालयाचे मुख्याध्यापक काशिनाथ लक्ष्मण तळपाडे आणि डॉ. अण्णासाहेब शिंदे कनिष्ठ महाविद्यालयाचे मुख्याध्यापक राजेंद्र चंद्रभान काकड उपस्थित होते.