डहाणू बाजारपेठेत सेंधा मिठाच्या विक्रीत वाढ
''रॉक सॉल्ट''ला ग्राहकांकडून उत्स्फूर्त प्रतिसाद
कासा, ता. ४ (बातमीदार) : डहाणू बाजारपेठेत गेल्या काही दिवसांपासून सेंधा (सेंधव) मीठ किंवा रॉक सॉल्ट खरेदी करणाऱ्या ग्राहकांच्या संख्येत मोठी वाढ झाली आहे. आरोग्यदायी पर्याय म्हणून या नैसर्गिक मिठाला डहाणूकरांकडून उत्स्फूर्त प्रतिसाद मिळत आहे.सुरत येथील विक्रेते राम पाल हे मागील आठ दिवसांपासून डहाणू बाजारात सेंधा मिठाची विक्री करत आहेत. आरोग्यदायी पर्याय म्हणून ओळखल्या जाणाऱ्या सेंधा मिठाच्या वाढत्या मागणीमुळे डहाणू बाजारपेठेत याची चांगली उलाढाल होत आहे
पांढऱ्या सेंधा मिठाचे पॅकेट ५० रुपयांपासून उपलब्ध आहे, तर इतर प्रकारचे पॅकेट १०० ते २०० रुपयांपर्यंत विकले जात आहेत. मोठ्या खड्यांचे सेंधा मीठ किलोला तब्बल ३०० रुपये दराने विकले जात आहे, ज्याला स्थानिक नागरिक मोठ्या प्रमाणावर उत्सुकता दाखवत आहेत. डहाणूकरांनी सेंधा मिठाला उत्तम प्रतिसाद दिला आहे. आरोग्यदायी पर्याय म्हणून अनेक ग्राहक हे मीठ नियमितपणे खरेदी करत आहेत." असे विक्रेते राम पाल यांनी सांगितले.

सेंधा मीठाचे वैशिष्ट्य
सेंधा मीठ हे समुद्राचे पाणी बाष्पीभवन करून तयार होत नाही, तर ते जमिनीखालच्या जुन्या खाऱ्या पाण्याच्या नैसर्गिक साठ्यांमधून खाणकामाद्वारे (उत्खनन) मिळवले जाते. हे मीठ मोठ्या खडकांच्या स्वरूपात असल्याने त्याला रॉक सॉल्ट असेही म्हटले जाते. हे मीठ पृथ्वीच्या खोल भागातील मिठाच्या शिळांमधून खोल शाफ्ट खाणकाम किंवा व्हॅक्यूम खाणकाम पद्धतीने बाहेर काढले जाते आणि नंतर रासायनिक व भौतिक प्रक्रिया करून शुद्ध केले जाते.