तक्रारदार महिलेवर
पोलिसाचा अत्याचार
कासा, ता. ८ (बातमीदार) ः कौटुंबिक तक्रारी अर्जाची चौकशी करण्यासाठी कासा पोलिस ठाण्यात आलेल्या एका महिलेवर पोलिस हवालदारानेच लैंगिक अत्याचार केल्याची घटना डहाणू तालुक्यात कासा येथे उघडकीस आली. याप्रकरणी हवालदार शरद भोगाडे (वय ४१) याच्याविरुद्ध गुन्हा दाखल करून त्यास अटक करण्यात आली.
२९ नोव्हेंबर रोजी तक्रार अर्जाची चौकशी करण्यासाठी पीडित महिला कासा पोलिस ठाण्यात गेली होती. या वेळी हवालदाराने पोलिस ठाण्यामागील एका खोलीत तिच्यावर अत्याचार केला. पीडितेने दिलेल्या तक्रारीनुसार, हवालदाराविरोधात लैंगिक अत्याचारासह विविध कलमांखाली गुन्हा नोंदवण्यात आला. त्यानंतर रविवारी रात्री त्यास अटक करण्यात आली. घटनेची माहिती मिळताच पालघरचे पोलिस अधीक्षक यतीश देशमुख यांनी संबंधित अधिकाऱ्यांकडून अहवाल मागवला. दरम्यान, कासा पोलिस ठाण्याचे प्रभारी अविनाश मांदळे यांचीही तत्काळ जिल्हा मुख्यालयात बदली करण्यात आली आहे. याप्रकरणी कासा पोलिस पुढील तपास सुरू असून, आरोपी हवालदारावर कठोर कारवाईची मागणी होत आहे.