नाटिकेतून भारतीय संस्कृतीची झलक
विक्रोळीतील डॉ. बाबासाहेब आंबेडकर विद्यालयाचे स्नेहसंमेलन

घाटकोपर, ता. ९ (बातमीदार) : विद्या विकास एज्युकेशन सोसायटी, विक्रोळी येथील डॉ. बाबासाहेब आंबेडकर विद्यालय (इंग्रजी माध्यम) माध्यमिक विभागातर्फे आयोजित वार्षिक स्नेहसंमेलनात विद्यार्थ्यांनी ‘युगांतर’ नाटिका नुकतीच सादर केली. या नाटिकेतून भारतीय संस्कृतीची झलक दाखवण्यात आली.
सत्ययुग, त्रेतायुग, द्वापारयुग आणि कलियुग या चार युगांवर आधारित नृत्य नाटिकेतून अधर्मावर धर्माचा आणि असत्यावर सत्याचा सदैव विजय होतो, हा संदेश विद्यार्थ्यांनी दिला. मत्स्यावतार, वराहावतार ते राम-कृष्ण अवतारापर्यंतच्या विविध भूमिकांमध्ये विद्यार्थ्यांनी साकारलेला अभिनय, वेशभूषा, मेकअप आणि सादरीकरण याचे कौतुक करण्यात आले.
कार्यक्रमाला संस्थेचे सचिव डॉ. विनय राऊत, उपमुख्य कार्यकारी अधिकारी डॉ. अनघा राऊत, प्रमुख पाहुण्या व उद्योजिका कविता दामले, माजी विद्यार्थिनी डॉ. हर्षिता गोसावी, ॲड. नीलेश कुंभार यांच्यासह पालक आणि विद्यार्थी मोठ्या संख्येने उपस्थित होते.