साडेपाच कोटींची दागिन्यांची बॅग लंपास
सोलापूर-मुंबई सिद्धेश्वर एक्स्प्रेस प्रवासादरम्यान घटना
कल्याण, ता. ९ ( वार्ताहर) : सिद्धेश्वर एक्स्प्रेसने सोलापूरहून मुंबईला प्रवास करणाऱ्या मुंबईतील सोन्या-चांदीच्या बड्या व्यापाऱ्याची साडेपाच कोटी रुपयांची सोन्याने भरलेली बॅग अनोळखी चोरट्याने सोलापूर कल्याण रेल्वे प्रवासादरम्यान लंपास केली. याप्रकरणी कल्याण रेल्वे पोलिस ठाण्यात गुन्हा दाखल करण्यात आला आहे.
गोरेगाव येथे राहणारे सोन्या-चांदीचे व्यापारी अभयकुमार जैन हे सोलापूरला गेले होते. सोलापूरहून मुंबईच्या दिशेने येण्यासाठी त्यांनी ६ डिसेंबरला सिद्धेश्वर एक्स्प्रेस पकडली होती. त्यांचे एसी कोचचे तिकीट होते. एसी कोचने ते प्रवास करीत होते. त्यांच्याकडे साडेपाच कोटी रुपये किमीतीची सोन्याने भरलेली बॅग होती. त्यांनी ती बॅग लॉक करून ठेवली होती. प्रवासादरम्यान ते झोपी गेले. पहाटेच्या सुमारास गाडी कल्याणला पोहोचली. तेव्हा जैन यांनी ठेवलेली सोन्याची बॅग गायब असल्याचे दिसले. सोन्याची बॅग चाेरीला गेल्याची बाब त्यांना कल्याण रेल्वेस्थानकाजवळ गाडी आल्यावर कळाल्याने याप्रकरणी त्यांनी कल्याण रेल्वे पोलिस ठाण्यात तक्रार दिली आहे. कल्याण रेल्वे पोलिसांनी याप्रकरणी गुन्हा दाखल केला आहे.