अंबरनाथ, ता. १० (वार्ताहर) : महाराष्ट्र दारूबंदी कायद्याचे उल्लंघन करून अवैध दारूची विक्री करणाऱ्या दोन आरोपींवर अंबरनाथ पोलिसांनी कारवाई केली आहे. या कारवाईत पोलिसांनी देशी, विदेशी; तसेच गावठी हातभट्टीची दारू जप्त करून दोघांना अटक केली.
पहिली कारवाई अंबरनाथ पूर्व पोलिस ठाण्याच्या हद्दीत झाली. शिवाजीनगर पोलिस ठाण्यातून मिळालेल्या माहितीनुसार, मंगळवारी (ता. ९) सायंकाळी ६ वाजता महालक्ष्मी नगर, अंबरनाथ पूर्व येथील रहिवासी पंकज शिर्के (वय २८) याच्यावर गुन्हा दाखल करण्यात आला. पोलिस शिपाई हमीद शेख यांच्या तक्रारीनुसार, आरोपीने घरासमोरच पांढऱ्या, निळ्या, काळ्या व हिरव्या पिशव्यात देशी व विदेशी दारू बाळगून विक्री केली. पोलिसांनी याप्रकरणी गुन्हा नोंदवला आहे. पुढील तपास पोलिस उपनिरीक्षक बावरकर करत आहेत. दुसरी कारवाई अंबरनाथ पश्चिम पोलिस ठाण्याच्या हद्दीत झाली. येथे गावठी हातभट्टीची दारूविक्री करणाऱ्या शिवलकुमार देवराम (वय ४६, रा. भीमानगर) याला रात्री ८ वाजता स्वामीनगर, रेल्वे मार्गाजवळ पोलिसांनी ताब्यात घेतले. पोलिस शिपाई अमर किरपन यांच्या तक्रारीनुसार गुन्हा दाखल केला आहे. या प्रकरणाचा पुढील तपास महिला पोलिस उपनिरीक्षक लीला धोरात करत आहेत. कारवाईत पोलिसांनी अवैध दारू विक्रीवर ठोस पावले उचलत नागरिकांमध्ये कायदेशीर आणि सुरक्षित वातावरण राखण्याचा प्रयत्न केला आहे.