अंबरनाथ (वार्ताहर) ः अंबरनाथमध्ये रिक्षामधून मोठ्या प्रमाणात गुटखा वाहतूक करणाऱ्या एका व्यक्तीसह रिक्षाचालकाला पोलिसांनी बेड्या ठोकल्या आहेत. या दोघांकडून गुटखा आणि रिक्षा असा सुमारे दीड लाखांचा मुद्देमाल हस्तगत करण्यात आला असून अंबरनाथ पोलिस ठाण्यात गुन्हा दाखल आहे. मनोज उदय प्रजापती (वय ३२) आणि रिक्षाचालक अतुल विचारे (३८) हे रिक्षातून बुधवारी (ता. १०) संध्याकाळच्या सुमारास अंबरनाथ पश्चिम येथील रेल्वे स्थानकाजवळ डीएमसी सेवा रस्त्यावरून गुटखा घेऊन जात असल्याची गुप्त माहिती पोलिसांना मिळाली होती. त्यानुसार रिक्षाची झाडाझडती घेतली असता त्यामध्ये हजारोंचा प्रतिबंधित गुटखा सापडला. रिक्षाचालक आणि प्रजापती यांच्याविरोधात गुन्हा दाखल करण्यात आला आहे.