जिल्हास्तरीय स्पर्धेत दिव्यांग चमकले
जव्हार, ता. ११ (बातमीदार) ः पालघर जिल्हा परिषदेमार्फत जागतिक दिव्यांग दिनानिमित्त पालघर येथे स्पर्धा घेण्यात आल्या. जिल्हास्तरीय दिव्यांग क्रीडा स्पर्धेत जव्हारच्या प्रगती प्रतिष्ठान संचालित नीलेश मुर्डेश्वर कर्णबधिर विद्यालयाने विविध खेळांमध्ये २३ बक्षिसे मिळवली.
पालघर जिल्हाधिकारी डॉ. इंदुराणी जाखड यांच्या हस्ते क्रीडा स्पर्धेचे उद्घाटन झाले. कार्यक्रमाला पालघर जिल्हा परिषद मुख्य कार्यकारी अधिकारी मनोज रानडे, जिल्हा पोलिस अधीक्षक यतीश देशमुख, जि.प. अतिरिक्त मुख्य कार्यकारी अधिकारी रवींद्र शिंदे, तसेच जिल्हा समाजकल्याण अधिकारी डॉ. प्रकाश हसनाळकर उपस्थित होते. दिव्यांग विद्यार्थ्यांना शिक्षणासह सामाजिकदृष्ट्या सक्षम करण्यासाठी विशेष शाळा उत्तम कार्य करीत असल्याचे जिल्हाधिकारी डॉ. इंदुराणी जाखड म्हणाले. या स्पर्धेत २५० हून अधिक दिव्यांग विद्यार्थ्यांनी सहभाग घेतला होता.