बदलापूर गावात ईडीचा छापा
बदलापूर, ता. ११ (बातमीदार) ः पश्चिमेतील बदलापूर गाव परिसरात गुरुवारी (ता. ११) सकाळी अंमलबजावणी संचालनालयाच्या (ईडी) पथकाने छापा टाकल्याने गावात खळबळ उडाली. मोहल्ल्यातील एका घरावर ही कारवाई करण्यात येत असून, परिसरात मोठ्या प्रमाणात ईडी अधिकारी, तसेच पोलिसांचे जाळे तैनात करण्यात आले आहे. ईडीकडून संबंधित घरात तपासणी आणि चौकशी सुरू आहे; मात्र अधिकृत माहिती अद्याप देण्यात आलेली नाही.
भिवंडीतील पडघा येथे पहाटे ईडी व एटीएसने संयुक्तपणे केलेल्या दहशतवादी कृत्यांना आर्थिक पुरवठ्याच्या संशयित कारवाईदरम्यान मिळालेल्या माहितीचा धागा बदलापूर गावातील एका व्यक्तीकडे जोडला गेल्याचे सूत्रांचे म्हणणे आहे. त्यानुसार सकाळीच ईडीचे दुसरे पथक बदलापूरला दाखल झाले. चौकशीअंती या संशयित घरातील वस्तुस्थितीचे स्वरूप स्पष्ट होणार असले, तरी बदलापूरमध्ये ईडीची उपस्थिती लागल्याने विविध चर्चांना उधाण आले आहे. अधिकृत माहिती उपलब्ध होण्याची प्रतीक्षा सुरू असून, पुढील कारवाईकडे सर्वांचे लक्ष लागले आहे.